Treningsprogram for langtur med pulk

Marte, Turid og eg har ulike måtar å førebu oss på langtur på; Marte har vore i Patagonia på fjelltur i ein månad og går masse på tur med guidejobben på Svalbard, og satsar på å verte seig på den måten. Turid går på ski og er uansett megasterk og eit arbeidsjern, medan eg har laga treningsprogram i lag med Mari, som eg skal gå Amundsenekspedisjonen med. Det er kjempebra motivasjon for å orke seg ut fem gongar i veka, for Amundsen vert forferdeleg tungt om vi ikkje er sterke nok! Vi laga treningsprogram i haust som gjeld fram til skiløpet no i slutten i februar, og eg satsar på å halde fram med noko tilsvarande fram til avreise til Svalbard i slutten av mars.

Treningsprogrammet består av fem økter i veka: to pulk-/dekkøkter, to langtur-/langrennsøkter og éin styrkeøkt. Pulk-/dekkøktene er viktige for å venne kroppen til belastinga det er å dra på ein pulk mange timer kvar dag i lang tid. Det tek tid for senene å verte sterke, så treninga lyt eigentleg starte lang tid før ekspedisjonen, og sikkert litt tidlegare enn eg starta. Men men.

Mari og eg har trent kvar for oss i Bergen og på Rauland, og oppdatert eit felles dokument som verkar som eit kombinert treningsprogram og treningsdagbok. Det har funka kjempebra! Om de fylgjer lenka under, kan de lese programmet og dagboka og la dykk inspirere! Trening med dekk avlar dessuten mange artige kommentarar frå mannen på gata :)